အသက် (၁၇)နှစ်ခန့်က နေရပ်မှ မော်လမြိုင်မြို့သို့ ရထားနဲ့သွားရောက်စဉ် ရထားပေါ်မှာ တွေ့ခဲ့တဲ့ အမျိုးသမီးတစ်ဦးက အိပ်ဆေးခတ် ခေါ်ဆောင်သွားခဲ့တယ်။
တရုတ်နိုင်ငံမှာ ၁၃ နှစ် ကြာ လူကုန်ကူးခံခဲ့ရကာ တရုတ်အမျိုးသားနှစ်ဦးနဲ့ လက်ထပ်ခဲ့ရပြီး ကလေးနှစ်ဦး မွေးခဲ့ရတဲ့ မြန်မာအမျိုးသမီးတစ်ဦးကို တရတ်ရဲတပ်ဖွဲ့ရဲ့ အကူအညီနဲ့ ကယ်တင်ခဲ့တယ်လို့ သိရပါတယ်။
မွန်ပြည်နယ်ဇာတိဖြစ်တဲ့ အမျိုးသမီးဟာ တရုတ်အမျိုးသားနှစ်ဦးနဲ့ ပေါင်းသင်းကာ ကလေးနှစ်ဦးရှိတဲ့အပြင် ကိုယ်ဝန်လည်း လွယ်ထားရတာဖြစ်ပါတယ်။
အဆိုပါ အမျိုးသမီးကို မြန်မာနိုင်ငံလူကုန်ကူးမှု တားဆီးနှိမ်နင်းရေး ရဲတပ်ဖွဲ့၊ ၈၈ မျိုးဆက် ကျောင်းသားအချို့နဲ့ တရုတ်နိုင်ငံ ရွှေလီရဲတပ်ဖွဲ့တို့ ချိတ်ဆက်ကာ ဧပြီ ၂၁ ရက်က မြန်မာနိုင်ငံသို့ ပြန်လည်ခေါ်ယူခဲ့ကြောင်း လူကုန်ကူးမှုတားဆီးနှိမ်နင်းရေးရဲတပ်ဖွဲ့မှ ရဲအရာရှိ တစ်ဦးက ပြောကြားထားတယ်လို့ 7Day Daily ရဲ့ သတင်းတစ်ရပ်မှာ ဖော်ပြထားပါတယ်။
‘‘မူဆယ်နဲ့ မော်လမြိုင် လူကုန်တားရဲတပ်ဖွဲ့ရယ်၊ လူမှုဝန် ထမ်းဦးစီးဌာနရယ် ဦးဆောင်ပြီး ကလေးမလေး မိဘတွေဆီ ပြန်ပို့နိုင်ရေး ဆောင်ရွက်ခဲ့ကြတာပါ။ သူ (လူကုန်ကူးခံရသူအမျိုးသမီး) (၁၇)နှစ်အရွယ်က လူကုန်ကူးခံခဲ့ရတာဖြစ်ပြီး အခုဆို အသက် (၃၀) ရှိပါပြီ’’ လို့ အဆိုပါ ရဲအရာရှိက ပြောကြားထားတာ ဖြစ်ပါတယ်။
အမျိုးသမီးဟာ အသက် (၁၇)နှစ်ခန့်က နေရပ်မှ မော်လမြိုင်မြို့သို့ ရထားနဲ့သွားရောက်စဉ် ရထားပေါ်မှာ တွေ့ခဲ့တဲ့ အမျိုးသမီးတစ်ဦးက အိပ်ဆေးခတ် ခေါ်ဆောင်သွားပြီး တရုတ်နိုင်ငံသို့ လူကုန်ကူးခဲ့တာ ဖြစ်တယ်လို့ ရဲတပ်ဖွဲ့ထံ ထွက်ဆိုထားကြောင်း သတင်းမှာ ဖော်ပြပါတယ်။
တရုတ်နိုင်ငံမှာ နေထိုင်ခဲ့စဉ် တရုတ်အမျိုးသားနှစ်ဦးနဲ့ လက်ထပ်ခဲ့ရပြီး ပထမအိမ်ထောင်နဲ့ ကလေးနှစ်ဦး မွေးဖွားခဲ့ရကာ ဒုတိယအိမ်ထောင်နဲ့ ကိုယ်ဝန်ဆောင်ထားရကြောင်း အဆိုပါအမျိုးသမီးနဲ့ တွေ့ဆုံသူတစ်ဦးက ပြောကြားထားပါတယ်။
လူကုန်ကူးခံရသူအမျိုးသမီးကို မိဘနေအိမ်သို့ ပြန်လည်ပို့ဆောင်ခဲ့ကြောင်း မွန်ပြည်နယ် ရဲတပ်ဖွဲ့ ရဲမှူးကြီး ဘိုဘိုဦးက ဧပြီ ၂၃ ရက်က ပြောထားပြီး လူကုန်ကူးခဲ့တဲ့ အမျိုးသမီးကို ရဲတပ်ဖွဲ့က ဖမ်းမမိသေးဘဲ စုံစမ်းနေဆဲ ဖြစ်ကြောင်းလည်း သိရပါတယ်။
Source: 7Day Daily
0 comments :
Post a Comment