သို့သော် မလွင်ကြုံနေရသည်က ဗီဒီယိုထဲတွင် သရုပ်ဆောင်နေခြင်း မဟုတ်။
အမှန်တကယ် ကျားရှေ့ မှောက်လျက်လဲနေခြင်းပင်။
“အဲဒီညက အလုပ်ဝင်ပြီး လေးရက်မြောက်ည။ ဂျပန်ကြီးက အလုပ်က ပြန်လာတယ်။ ညစာစားပြီးတော့ ကျွန်မကို လက်ဟန်ခြေဟန်နဲ့ နှိပ်ခိုင်းတယ်။ သူ့တစ်ကိုယ်လုံး အတွင်းခံ ဘောင်းဘီကလွဲပြီး ဘာအဝတ်အစားမှ မပါဘူး။ ကျွန်မ နှိပ်ပေးနေတုန်း ဟိုကိုင်ဒီကိုင်လုပ်တယ်” ဟု မလွင်က သူ၏ ပထမဆုံး ငရဲခန်းကို ပြောပြသည်။
“အဲဒါနဲ့ ကျွန်မလည်း အတင်းရုန်းကန်ပြီး သူ့အခန်းထဲက ထွက်လာလိုက်တယ်၊ ဒါပေမဲ့ . . .”
သို့သော် ထိုငရဲခန်းတို့မှ မလွင် (အမည်လွှဲ) မလွတ်မြောက်နိုင်တော့ကြောင်း နောက်တစ်နေ့တွင် သိခွင့်ရလိုက်သည်။
“ပွဲစား အန်တီကြီးဆီ ဖုန်းဆက်ပြီး ဒီအိမ်မှာ ဆက်မလုပ်နိုင်တော့ဘူးလို့ ကျွန်မ ပြောခဲ့တယ်။ အဲဒါဆို ကြိုတင်ငွေပေးထားတဲ့ သုံးလစာ ငွေကိုးသိန်း ပြန်ပေးရမယ်လို့ သူက ပြန်ပြောတယ်။ မပေးနိုင်ရင် တရားစွဲမယ်တဲ့။ တစ်လစာကို ပွဲခပေးခဲ့ရတော့ အိမ်ကို ပြန်ပေးခဲ့နိုင်တာက ခြောက်သိန်းထဲလေ။ ကျွန်မတို့ အခြေအနေနဲ့ ဘယ်လိုမှ မလျော်နိုင်ဘူး” ဟု မလွင်က ဆိုသည်။
အသက် ၂၅ နှစ်အရွယ် မလွင်မှာ ဧရာဝတီတိုင်းဒေသကြီး ညောင်တုန်းမြို့ အနီးရှိ ရွာလေးတစ်ရွာမှ ဖြစ်သည်။ ညောင်တုန်းမြို့ရှိ စတိုးဆိုင်တစ်ဆိုင်က အရောင်းသမအဖြစ် အသက်မွေးခဲ့သည်။မောင်နှမလေးယောက်အနက် မလွင်က အကြီးဆုံးဖြစ်ပြီး ရှစ်တန်းအထိ ကျောင်းနေဖူးခဲ့၏။
ဖခင်ဖြစ်သူမှာ အနှေးယာဉ်လုပ်သားတစ်ဦး ဖြစ်ပြီး မိခင်ဖြစ်သူ ကောက်စိုက်သမတစ်ဦး ဖြစ်သည်။
မလွင်တို့ မိသားစုဘဝမှာ ဆင်းရဲကြပ်တည်းလွန်းလှပြီး မလွင်အောက်မှ ညီမဖြစ်သူမှာ ညောင်တုန်းမြို့ရှိ သူဌေးအိမ်တစ်အိမ်တွင် အိမ်အကူအဖြစ် တစ်လသုံးသောင်းဖြင့် လုပ်ကိုင်နေရ၏။
တိုင်းရင်းသူသွေးပါပြီး ဖြူဖြူချောချော မလွင်၏ ဘဝကို တစ်ဆစ်ချိုး ပြောင်းလဲစေမည့် ကြမ္မာတစ်ရက်တွင် ဆိုက်ဆိုက်မြိုက်မြိုက် ရောက်လာတော့သည်။
“အဲဒီနေ့က ညီမတို့က ပုံမှန်ပဲ ဈေးရောင်းနေတာ။ ချောင်းသာက ပြန်လာတဲ့ ကားတစ်စီးက ဈေးဝင်ဝယ်တယ်။ ကားပေါ်ပါလာတဲ့ အန်တီကြီးက ဒီကကောင်မလေးတွေ ရန်ကုန်မှာ အလုပ်လုပ်ချင်ပြော၊ လစာကောင်းကောင်းရမယ်ဆိုပြီး ဖုန်းနံပါတ်တစ်ခု ပေးသွားတယ်” ဟု မလွင်က ဆိုသည်။
နောက်တစ်နေ့တွင် ရန်ကုန်မြို့တွင် လစာကောင်းကောင်းရမည့် အိပ်မက်တစ်ခုကို မလွင် မက်တော့၏။
ထို့နောက် မလွင်က အန်တီကြီး ပေးခဲ့သော နံပါတ်ကို ဖုန်းဆက်ပြီး မေးလိုက်သည်။
“နိုင်ငံခြားသားအိမ်မှာ အိမ်အကူ လုပ်ပေးရမယ်၊ ထမင်းချက်၊ ဟင်းချက်၊ အဝတ်လျှော်ပေါ့၊ စားစရိတ်ငြိမ်း တစ်လကို သုံးသိန်းရမယ်လို့ သူက ပြောတော့ ကျွန်မ တော်တော်ဝမ်းသာသွားတယ်” ဟု မလွင်က ဆိုသည်။
မိသားစုလေးယောက် အလုပ်ထွက်လုပ်သည်တောင်မှ တစ်ရက် သုံးထောင်ခန့်သာ ဝင်ငွေရှိသော မလွင်တို့ မိသားစုအဖို့ တစ်ယောက်တည်း လုပ်ခလစာငွေ သုံးသိန်းသည် မက်လောက်စရာပင်။
“ကျွန်မ ရန်ကုန်တက်လာတော့ အန်တီကြီးက ကားလက်မှတ်ကအစ စီစဉ်ပေးတယ်။ လာကြိုတယ်။ သူ့အိမ်မှာ နှစ်ရက်လောက်နေပြီး ကျွန်မကို အခုနေတဲ့ ပုလဲကွန်ဒိုက သူဌေးဆီကို ခေါ်သွားတယ်” မလွင် အလုပ်လုပ်ရမည့် သူဌေးမှာ အသက် ၅၀ ခန့်ရှိ ဂျပန်လူမျိုးဖြစ်သည်။
မြန်မာနိုင်ငံတွင် နှစ်ရှည်လာရောက်လုပ်ကိုင်နေသည့် ကုမ္ပဏီတစ်ခုမှ ဖြစ်ကြောင်းလည်း သိရသည်။
မလွင်ကို ခြေဆုံးခေါင်းဆုံး ကြည့်ပြီးနောက် ဆေးရုံတွင် ဆေးစစ်ဖို့ ဆေးစစ်ချက်အဖြေကို ကြည့်ပြီးမှ အလုပ်ခန့်မည်ဟု ဆိုသည်။
ဤသို့ဖြင့် အန်တီကြီးအိမ်တွင်နေရင်း ရန်ကုန်ရှိ ဆေးရုံများတွင် မလွင် ဆေးစစ်ရသည်။
ဆေးစစ်ချက်များအရ မလွင်တွင် ဘာမျှမရှိ။
ထိုအခါကျမှ မလွင်ကို နိုင်ငံခြားသားသူဌေးက တစ်လ သုံးသိန်းဖြင့် သုံးလစာ ကိုးသိန်းပေးကာ စာချုပ်တွင် လက်မှတ်ထိုးစေပြီး အလုပ်ခန့်လိုက်သည်။
“ပွဲစား အန်တီကို တစ်လစာ ပေးရတယ်။ ကျန်တဲ့ခြောက်သိန်းကို အိမ်ကို ချက်ချင်းလွှဲလိုက်တယ်။ အိမ်က ဓနိမိုးနဲ့ နေရတာ မိုးယိုတယ်။ သွပ်မိုးဖို့နဲ့ အိမ်ပြင်ဖို့ အတွက်ပေါ့” ဟု မလွင်က ဆိုသည်။
သူဌေးအိမ် ရောက်သည့်အခါမှ သူဌေးက မိသားစုမရှိသည့် တစ်ကိုယ်တည်းသမား ဖြစ်ကြောင်း မလွင်သိရသည်။
“ယောက်ျားတစ်ယောက်နဲ့ တစ်မိုးတည်းအောက်မှာ ညလုံးပေါက် အတူရှိမနေသင့်ဘူး ဆိုတာ ကျွန်မ စဉ်းစားမိပါတယ်။ ဒါပေမဲ့ ကျွန်မမှာ ညဘက်ပြန်စရာအိမ် မရှိဘူး၊ သူဌေးနဲ့ကလည်း လက်ဟန်ခြေဟန်နဲ့ပဲ ပြောနေရတော့ ပွဲစားကို ဖုန်းဆက်ပြောလိုက်တယ်၊ ပွဲစားက သူဌေးနဲ့ ညှိပေးမယ်လို့ ပြောတယ်၊ သူပြန်ပြောတာက ညဘက် အချိန်ပိုဆင်းတယ်ပဲ သဘောထားလိုက်ပါ၊ အဲဒီအတွက် သူဌေးက တစ်လကို ဘောက်ဆူး တစ်သိန်းခွဲ ထပ်ပေးမယ်လို့ ပြောတယ်။ ကျွန်မလည်း ငွေလိုချင်တော့ လက်ခံလိုက်တယ်” ဟု မလွင်က ဆိုသည်။
ပထမနေ့များတွင် သူဌေးက အလုပ်သွားချိန်တွင် သူမက အဝတ်အစားများ လျှော်ဖွပ်၊ အိမ်သန့်ရှင်းလုပ်၊ သူဌေးပြန်လာခါနီးတွင် ညစာချက်ပြုတ် ပြင်ဆင်ပေးရသည်။
သူဌေးပြန်လာသောအခါ ညစာခင်းကျင်း ကျွေးပြီးနောက် သူဌေးက သူ့အခန်းတွင် သူဝင်အိပ်သည်။ ဘာမျှမထူးခြား။
လေးရက်မြောက်ညတွင်တော့ နှိပ်ခိုင်းရာမှ ဇာတ်လမ်းစသည့် ဖြစ်စဉ်နှင့် မလွင် ကြုံရတော့သည်။
“ဒါပေမဲ့ ငွေဖောဖောသီသီရတဲ့ ဒီအလုပ်က ကျွန်မမရုန်းထွက်နိုင်ဘူး။ ပြန်လျော်ရမယ့်ငွေကို မလျော်နိုင်တာလည်း ပါတယ်။ အတင်းထွက်ပြေးရင် လိုက်ဖမ်းပြီး ထောင်ချမယ်လို့လည်း ပွဲစားအန်တီက ပြောတယ်။ အဲဒီလိုနဲ့ ဆက်နေဖြစ်သွားတယ်” ဟု မလွင်က ဆိုသည်။
နောက်ပိုင်းရက်များတွင်တော့ မလွင်၏ အပျိုစင်ဘဝကို အသက် ၅၀ ကျော် ဂျပန်သူဌေး၏ လက်ဝယ် အပြီးအပ်နှံလိုက်ရသည်။
သူဌေးက တစ်ပတ်တစ်ခါ အဝတ်အစားအသစ်များ ဝယ်ပေးပြီး၊ ဆယ်ရက်တစ်ခါ ဘောက်ဆူးဟုဆိုကာ မုန့်ဖိုးများလည်း အလျှံအပယ် ပေးတတ်သည်။
“ဒီမှာ ဒီလိုနေတာ ရွာကလူတွေလည်း သိမှာမဟုတ်ဘူး။ အဓိကကတော့ ပိုက်ဆံအဆင်ပြေရင် ရွာပြန်လို့ ဝတ်နိုင်စားနိုင်ရင် လူအထင်ကြီးမှာပဲဆိုပြီး ကျွန်မ တွေးမိတယ်။ ဒီလိုနဲ့ပဲ သူဌေးနဲ့ ကျွန်မ မထူးဇာတ်ခင်းနေလိုက်တော့တယ်” ဟု မလွင်က ဆိုသည်။
မလွင်က မထူးဇာတ်ခင်းသည်ဟု ဆိုသော်လည်း ထို့ထက် မထူးသည့်ဇာတ်က သူမအတွက် နောက်ထပ်ရှိနေသေး၏။
တစ်ည သူဌေးပြန်လာသောအခါ ဂါဝန်ပါးပါးတစ်ထည် ဝယ်လာသည်။ ထိုမျှမက သူ့မိတ်ဆွေ နိုင်ငံခြားသား အဘိုးကြီးနှစ်ဦးလည်း ပါလာသည်။
“ကျွန်မကို အဲဒီဂါဝန်လေး ဝတ်ခိုင်းပြီး သူတို့ အရက်သောက်တဲ့အခါ အမြည်းချခိုင်းတယ်။ ဘေးက အရက်ငှဲ့ခိုင်းတယ်။ ပြီးတော့ သူတို့ သုံးယောက်နဲ့ အတူအိပ်ပေးဖို့ တောင်းဆိုတယ်။ အဲဒီညက သူတို့သုံးယောက်နဲ့ ကျွန်မ တစ်ယောက်တည်း အလှည့်ကျ နေပေးခဲ့ရတယ်” ဟု မလွင်၏ နောက်ထပ် မထူးဇာတ်ကို ကြားရပြန်ပါသည်။
မကြာခဏ ဆိုသလို သူဌေး၏ သူငယ်ချင်းများ ပါလာခဲ့ပြီး မလွင်မှာ အသုံးတော်ခံခဲ့ရသည်။
“ဧည့်သည်တွေက ညီမကို သူငယ်ချင်းရှိရင် ခေါ်ပေးပါ။ သူတို့လည်း အိမ်အကူ ခန့်ချင်လို့လို့ ပြောတယ်။ ညီမ မခေါ်ပေးပါဘူး။ ကိုယ့်လိုဘဝက ပျက်သထက်ပျက်မှာစိုးလို့။ အဲဒီတော့ သူတို့က ကျွန်မကို ခေါ်ပေးတဲ့ ပွဲစားအန်တီကို ဆက်သွယ်ပြီး လူရှာခိုင်းကြတာ သိရတယ်၊ အဲဒီအထဲမှာ ကျွန်မနဲ့ စတိုးဆိုင်မှာ အတူလုပ်ခဲ့တဲ့ ဝါးခယ်မက ကောင်မလေး တစ်ယောက်လည်း ပါသွားတယ်” ဟု မလွင်က ဆိုသည်။
မလွင်၏ သူငယ်ချင်း ဝါးခယ်မမှ ကောင်မလေးကတော့ ကံကောင်းသည်လား၊ ကံဆိုးသည်လား မပြောတတ်၊
သူမ၏သူဌေးမှာ တရုတ်လူမျိုးတစ်ဦး ဖြစ်ပြီး မလွင်ကို ပြုမူသည့် အတိုင်းပင် ခံခဲ့ရသည်။
ပိုဆိုးသည်မှာ တရုတ်သူဌေးမှာ သူမကို ဓမ္မတာအတိုင်း မဆက်ဆံဘဲ ရက်စက်စွာ ပြုကျင့်သဖြင့် လုပ်သက် နှစ်လအကြာတွင် အဆိုပါအိမ်မှ ထွက်ပြေးခဲ့သည်ဟု ဆိုသည်။
“သူ ထွက်ပြေးတော့မယ်ဆိုတော့ ကျွန်မကို ဖုန်းဆက်တယ်။ ဘယ်လိုမှ သည်းညည်းမခံနိုင်တော့ဘူးတဲ့၊ နောက်ပိုင်းကျ ပွဲစားတွေက သူ့အိမ်ကို ပိုက်ဆံတွေ ပြန်လျော်ဖို့ သွားခြိမ်းခြောက်ကြတယ် ကြားတယ်” ဟု မလွင်က ဆိုသည်။
ပွဲစားအမျိုးသမီး၏ အဆိုကတော့ ရှင်းသည်။ နှစ်ဦးနှစ်ဖက် သဘောတူညီမှုဖြင့်သာ ဝန်ဆောင်မှုပေးခြင်းဟု ဆိုသည်။
“စာချုပ်ချုပ်တာလည်း သူတို့နှစ်ဖက်က သဘောတူပြီးသားပဲ။ သူတို့အချင်းချင်း ကြည်ဖြူလို့ အပေးအယူတွေ ရှိကြတယ်။ တချို့ဆို စစချင်း စာချုပ်ချုပ်ကတည်းက ဒီလိုနေပေးရမယ်ဆိုတာ သိနှင့်ပြီးသားတွေပဲ။ နောက်ပိုင်း သူတို့ဘာသာ ပြဿနာဖြစ်တော့ စာချုပ်အတိုင်း ရှင်းကြပေါ့။ ကျွန်မတို့နဲ့ ဘာဆိုင်လို့လဲ” ဟု မြောက်ဒဂုံမြို့နယ်မှ အမည်မဖော်လိုသူ အိမ်ဖော်ပွဲစား အမျိုးသမီးကြီးက ဆိုသည်။
ယခုကဲ့သို့ အိမ်တွင်းအငှားမယား အဖြစ်ပါ နေပေးရမည်ကို သိသိကြီးနှင့် တမင်တကာ လစာမက်ကာ လာလုပ်ကြသော အိမ်ထောင်ရှင် အမျိုးသမီးအချို့လည်း ရှိသေးကြောင်း သူက ထပ်ပြောလိုက်သေးသည်။
“တချို့က ယောက်ျားက အရက်သမား၊ ကလေးက နှစ်ယောက်လောက် ရှိတယ်။ အသက်ကလည်း ငယ်သေးတယ်။ အဆင်မပြေတော့ အလုပ်လာချိတ်တယ်၊ သူတို့ကျတော့ အပျိုမဟုတ်တော့ လစာတော့ သိပ်မကောင်းဘူးပေါ့” ဟု ၎င်းကပင် ဆိုသည်။
၂၀၁၁ ခုနှစ် နောက်ပိုင်း မြန်မာနိုင်ငံတွင် နိုင်ငံခြား တယ်လီဖုန်း အော်ပရေတာ ကုမ္ပဏီများ၊ အခြားနိုင်ငံခြားရင်းနှီးမြှုပ်နှံမှုများ ပေါ်ပေါက်လာပြီးနောက် ယခင် ပြည်တွင်းအိမ်ဖော်ပွဲစားများထက် နိုင်ငံခြားသားများနှင့် ဆက်သွယ်ပေးသည့် အိမ်ဖော်ပွဲစားများ ခေတ်ကောင်းလာကြသည်။
အိမ်ဖော်ပွဲစားများ၏ ဈေးကွက်ကုန်ကြမ်းမှာ အလုပ်အကိုင်ရှားပါးပြီး၊ ဝင်ငွေနည်းပါးသော နယ်ဘက်မှ ရိုးသားသော အမျိုးသမီးလေးများ ဖြစ်သည်။
ထိုနိုင်ငံခြားသားထံတွင် လုပ်ရမည့် အိမ်ဖော်ဈေးကွက်သည် တဖြည်းဖြည်းနှင့် မြန်မာပြည်တွင် နှစ်ရှည်နေသည့် နိုင်ငံခြားသားများအတွက် အငှားမယားဈေးကွက် ဖြစ်လာတော့သည်။
“ကျွန်တော်တို့ရုံးက Foreigner (နိုင်ငံခြားသား) တော်တော်များများမှာ အဲဒီလို အငှားမယား မြန်မာမလေးတွေ ကိုယ်စီရှိကြတယ်၊ သူတို့အချင်းချင်း ကြွားကြတဲ့အခါ သတိထားမိတာပေါ့၊ အနောက်နိုင်ငံသားတွေ၊ အိန္ဒိယတွေကတော့ အဲဒီလို သိပ်မရှိကြဘူး။ အများဆုံးက ဂျပန်၊ တရုတ်၊ ကိုရီးယား အစရှိတဲ့ အာရှနိုင်ငံသားတွေပါ” ဟု တယ်လီဖုန်း အော်ပရေတာ တစ်ခုတွင် အရာရှိအဆင့်ဖြင့် လုပ်ကိုင်နေသူ ကိုစိုးမိုးလင်းက ဆိုသည်။
ယခုကဲ့သို့ ဖြစ်စဉ်များသည် ပြည်တွင်းလူကုန်ကူးမှုဟု ခေါင်းစဉ်တပ်ရမည် ဖြစ်ပြီး လူကုန်ကူးမှု တားဆီးနှိမ်နင်းရေး အက်ဥပဒေနှင့် ငြိစွန်းကြောင်း ဆိုလာသူက ဥပဒေအကြံပေးတစ်ဦး ဖြစ်သူ ဦးခင်မောင်မြင့် ဖြစ်သည်။
လူကုန်ကူးမှု တားဆီးကာကွယ်ရေး ဥပဒေ (၅/၂၀၀၅) အခန်း (၁)၊ အပုဒ် (၃) အရ လူတစ်ဦးကို သူ၏ သဘောတူညီချက် ရှိသည်ဖြစ်စေ၊ မရှိသည်ဖြစ်စေ ခေါင်းပုံဖြတ်ရန် အလို့ငှာ သိမ်းသွင်းစုဆောင်းခြင်း၊ သယ်ယူပို့ဆောင်ခြင်း၊ လွှဲပြောင်းရောင်းချ ဝယ်ယူငှားရမ်းခြင်း၊ ခိုလှုံခွင့်ပေးခြင်းတို့မှာ လူကုန်ကူးမှုမြောက်သည်။
“ဒါဟာ လူကုန်ကူးမှု မြောက်ပါတယ်။ စာချုပ်စာတမ်း ဥပဒေအရလည်း နိုင်ငံတော် ဖွဲ့စည်းပုံအခြေခံဥပဒေနဲ့ မညီတဲ့ စာချုပ်တွေဟာ စချုပ်ဆိုကတည်းက အသက်မဝင်ဘူးဆိုတာ သိထားရမယ်။ စာချုပ်ကို ကြောက်စရာ မလိုဘူး။ အလိုမတူရင် မုဒိန်းမှုနဲ့ပါ တရားစွဲလို့ ရပါတယ်” ဟု ၎င်းကဆိုသည်။
ယခင်က အမျိုးသမီးငယ်များအား လူကုန်ကူးမှု ဆိုသည်နှင့် ထိုင်းနိုင်ငံတွင် လိင်ကျွန်အဖြစ် ရောင်းစားခံရမှုများ၊ တရုတ်နိုင်ငံသို့ မယားအဖြစ် ရောင်းစားခံရမှုများကိုသာ အများဆုံး သိရှိကြသော်လည်း ယခုကဲ့သို့ ပြည်တွင်းနေ နိုင်ငံခြားသားများထံ လူကုန်ကူးခံရမှုများကတော့ သိရှိသူ နည်းပါးလှသည်။
“ကျွန်မလို ဘဝတူတွေ ရန်ကုန်မှာ တဖြည်းဖြည်း များလာပြီလို့ သိရတယ်။ ကျွန်မတို့နဲ့ တစ်တိုက်တည်းမှာတင် ကျွန်မလိုလူတွေ မနည်းဘူး။ ကျွန်မက အခု သူဌေးအိမ်မှာ တစ်နှစ်ခွဲ ရှိပါပြီ။ မထူးလည်း မထူးတော့ပါဘူး။ မိသားစုအတွက် ငွေရှာပေးဖို့ပဲ သိတော့တယ်။ နောက်ညီမလေးတွေသာ ကျွန်မလိုမျိုး မဖြစ်စေချင်တဲ့ စေတနာနဲ့ အခုလို့ ဖွင့်ပြောရတာပါ” ဟု မလွင်က ဆိုလာသည်။
နိုင်ငံ၏ စီးပွားရေးနိမ့်ကျမှု၊ ဆင်းရဲချမ်းသာကွာဟမှု၊ အလုပ်အကိုင် အခွင့်အလမ်း ရှားပါးမှုတို့က ဆင်းရဲနွမ်းပါးသည့်နယ်ဘက်မှ သမီးပျိုလေးများအား နိုင်ငံခြားသားတို့၏ လိင်ကျေးကျွန်ဘဝသို့ သွတ်သွင်းနေသည်။
နောင်တွင် နိုင်ငံ၏ တိုးတက်လာသော အခြေအနေနှင့်အတူ နိုင်ငံခြားရင်းနှီးမြှုပ်နှံမှုများ၊ နှစ်ရှည်စီမံကိန်းများ အသီးသီး ဝင်လာကြဦးမည် ဖြစ်သည်။
ထိုစီမံကိန်းများနှင့်အတူ လိင်မှုကိစ္စ သောင်းကျန်းသော နိုင်ငံခြားသားများနှင့် ဆင်းရဲနွမ်းပါးသော မလွင်တို့ကဲ့သို့ အိမ်တွင်းလိင်ကျွန် အငှားမယား ဈေးကွက်လည်း ဆက်လက်ကြီးထွားလာနိုင်သည်။
ထိုအတွက် မည်သို့ ကာကွယ်ကြမည်နည်း။
ထို့အတွက် မည်သူ့တွင် တာဝန်ရှိပါသနည်း။
“ကျွန်မ တာဝန်ကတော့ မိုးလင်းကတည်းက အိမ်အလုပ်လုပ်၊ ညဘက် သူပြန်လာတော့ သူ့စိတ်တိုင်းကျ နေပေးလိုက်ရတာပါပဲ” မလွင်ကတော့ တစ်နေ့တာ သူ့တာဝန်ကို နွမ်းလျစွာ ပြောလာတော့သည်။
Credit: The Voice
0 comments :
Post a Comment